अब पुराना बैंक खातामा पनि राष्ट्रिय परिचयपत्र अनिवार्य, असोज मसान्तभित्र विवरण अपडेट गर्नुपर्ने

काठमाडौं

बैंक तथा वित्तीय संस्थालाई २०८३ असोज मसान्तभित्र सबै ग्राहकको KYC विवरण अद्यावधिक गरिसक्न निर्देशन।

नेपाल राष्ट्र बैंकले पुराना बैंक खातामा पनि राष्ट्रिय परिचयपत्र (National ID Card) नम्बर अनिवार्य गर्ने व्यवस्था लागू गरेको छ। यसका लागि बैंक तथा वित्तीय संस्थालाई आगामी २०८३ असोज मसान्तभित्र ग्राहकको राष्ट्रिय परिचयपत्र नम्बर अद्यावधिक गरिसक्न निर्देशन दिइएको छ।

राष्ट्र बैंकले एकीकृत निर्देशन, २०८२ संशोधन गर्दै बैंक खाताको सुरक्षा मजबुत बनाउने, प्रविधिमैत्री सेवा विस्तार गर्ने तथा ग्राहकको पहिचान प्रणालीलाई थप प्रभावकारी बनाउने उद्देश्यले यस्तो व्यवस्था लागू गरेको जनाएको छ।

यसअघि नेपाल राष्ट्र बैंकले २०७८ माघ १ गतेदेखि नयाँ बैंक खाता खोल्न राष्ट्रिय परिचयपत्र अनिवार्य गरेको थियो। अब भने यो व्यवस्था पुराना बैंक खातामा समेत लागू हुने भएको हो।

कसरी अद्यावधिक गर्ने?

निर्देशनअनुसार ग्राहकले बैंकमा प्रत्यक्ष उपस्थित भएर वा मोबाइल एप, इन्टरनेट बैंकिङ तथा अन्य डिजिटल माध्यमबाट आफ्नो राष्ट्रिय परिचयपत्र नम्बर अद्यावधिक गर्न सक्नेछन्। बैंकहरूले असोज मसान्तभित्र सबै ग्राहकको KYC विवरण अद्यावधिक गरिसक्नुपर्नेछ।

अझै परिचयपत्र नपाएकाको खाता बन्द हुँदैन

हालसम्म राष्ट्रिय परिचयपत्र प्राप्त नगरेका नेपाली नागरिकको बैंक खाता तत्काल बन्द नहुने राष्ट्र बैंकले स्पष्ट पारेको छ। यस्ता ग्राहकलाई परिचयपत्र प्राप्त गरेपछि KYC अद्यावधिक गर्न बैंकहरूले मोबाइल एप वा अन्य उपयुक्त माध्यमबाट जानकारी गराउने व्यवस्था मिलाउनुपर्नेछ।

विदेशमा रहेका नेपालीका लागि सहुलियत

विदेशमा रहेका नेपाली नागरिकका लागि राष्ट्रिय परिचयपत्रसम्बन्धी प्रक्रियामा विशेष सहुलियतको व्यवस्था गरिएको राष्ट्र बैंकले जनाएको छ। सम्बन्धित विवरण राष्ट्रिय परिचयपत्र तथा पञ्जीकरण विभागबाट प्राप्त गर्न सकिनेछ।

राष्ट्र बैंकका अनुसार यस व्यवस्थाले बैंकिङ प्रणालीलाई थप सुरक्षित, पारदर्शी र डिजिटल बनाउन सहयोग पुग्ने अपेक्षा गरिएको छ।